Beti Bachao, Beti Padhao sawiho

Saitual District Level Implementing Committee (DLIC) on Mission Shakti chu an chairman Srinivas Sadi, district bawrhsap kaihhruaiin nimin khan an ṭhukhawm a; hmeichhe naupangte dinhmun chawikanna tura sorkar laipui scheme 'Beti Bachao, Beti Padhao' Saitual district-a kalpui dan tur an sawiho.

Ṭhutkhawmah hian Beti Bachao, Beti Padhao atan hmalak dan tur (action plan) siam an rêl. Sikul hrang hrangah mipat hmeichhiatna chungchang inzirtirna (sex education) leh hmeichhe naupang hriat atana pawimawhte inzirtirna neih tura ruahman a ni a; women helpline - 181 leh child helpline - 1098 te chu a tam thei ang ber puanzar bakah, infiamna leh kut themthiamna lamahte hmalak an rel a ni.

Saitual Bawrhsap chuan, Beti Bachao, Beti Padhao chu hmeichhe naupangte dinhmun ṭha zawka an awm theihna tura duan a nih thu a sawi a; Saitual district-ah pawh he scheme hi ṭha taka kalpui a nih theih nan Women & Child Development-te chu Education department leh Health department-te nen ṭanghoa theihtawp chhuah turin a ngen.