Plastic Bag Free Day pualin a thlâwnin puan ip sem a ni

Nimin kha International Plastic Bag Free Day a ni a, he ni pual hian Mizoram Pollution Control Board (MPCB)-a EIACP Hub chuan Aizawl Bazarpui leh a chhehvelah hman khat daih sarâng (single-use plastic) hman tlem pawimawhzia an zirtir bakah, a thlâwnin cloth bag (puana siam ip) an sem.

EIACP Hub programme officer Benjamin Lalnunsanga Colney chuan thu sawiin, mipuite chu plastic ip, sarâng leh polythene hmang tlêm tur leh, hman loh tum turin a ngen a; bazara dawr nghâktute chu sarâng ip do rêm tumnaah a thawh hlâwk ber tur leh mawhphurhna lian tak nei an nih thu a sawi.

Benjamin Lalnunsanga Colney chuan, khawvelah plastic carry bag tlûklehdingâwn 5 (vbc 500) hman ral a nih ṭhin thu leh, plastic ûm minute tin nuai 10 hralh chhuah ziah ang a nih thu a sawi a, "Plastic bag leh bottle te hi rei lo te chhûng kan hmang a, bawlhhlawh an chang zui mai ṭhin. Rei lo tê atan chauha ṭangkai, kum tam tak chhung leilung tichhetu leh bawlhhlawh ni tur thil hi kan hman tlêm a, kan hnualsuat a hun tawh," a ti.

Inzirtirnaah hian sarâng leh polythene aiah a thlâkna atana ṭha lehkha ip (paper bag), net bag (lên), non-woven bag, jute bag leh a dangte chu hmang uar turin mipui an ngen a; hman khat daih sarâng hmang tlem tur leh hmang lo tura intiam mi 300 vel hnênah puan ip an pe a ni.