Rorelna dik vawn hi kan zaa mawh a ni - Home Minister

Home minister K Sapdanga chuan nimin khan Aijal Club-ah Mizoram State Legal Services Authority (MSLSA) leh Judicial Academy, Assam ten India dan thar pathum zirhona an buatsaih a hmanpui a; rinawmna, dikna, khawngaihna leh professionalism nena rorelna dik vawn tlat chu dan keng-kawhtute leh mipui mawh a nih thu a sawi.

K Sapdanga chuan, Bharatiya Nyaya Sanhita, Bharatiya Nagarik Suraksha Sanhita leh Bharatiya Sakshya Adhiniyame te chu kenkawh a nih danah a hlawhtlinna a innghat tih a sawi a, "Rule of law hi democratic khawtlang tana lungphûm a ni reng a, kan zaa kan mawhphurhna chu dân kenkawh mai chauh a ni lo a, rinawmna, dikna, khawngaihna leh professionalism nena rorelna dik vawn tlat zawk hi a ni. Dan tharte hi mipui hnena rorelna dik pek nana hman a nih theih nan thawhho a pawimawh," a ti.

Home Minister chuan, "Criminal justice system aṭanga mipui rinna an hlawh chhuah ṭhin chu thil sual tuartuin a hun taka rorelna dik a hmuh rual a, thilsual tia puhte pawh an constitutional right zahsak hi a ni," a ti a; constitutional democracy lungphum chu khauh taka dan lehkawh leh mimal zalenna vawnhim tawnnaah a innghat tlat tih a sawi.

Home Minister chuan, hun inher zelah organised crime leh technology hmanga sual tih a pun zel thu sawiin, "India dan thar pathumte hi mipuite ngai pawimawh lehzual zawk, rang zawka che chhuak thei, hun mamawh ang zela hmasawnna ruhrel leh theihna tihpun nan te, science leh technology hman ṭangkai lehzual nan leh tunlai khawtlang mamawh phuhhrûkna tur, criminal justice system thar a ni," a ti.

Zirhona hi Law & Judicial department-a finance & accounts officer Emily Lalnunthari Ralte-in a kaihruai a; Home secretary Vanlalmawia leh Gauhati High Court Aizawl Bench registrar Dr HTC Lalrinchhana te pawhin thu an sawi.

GAD executive magistrate te, judicial officer te, National Informatics Centre official te, sorkar ukil te, Home, Health & Family Welfare leh Law & Judicial department-a official-te an tel a ni.