Coronavirus hri léng sawiho a ni

Tunlaia China rama Coronavirus hri léng mek chungchangah nimin khan Union Health Secretary Preeti Sudan hoin India rama state zawng zawng huapin video conference neih a ni a; Mizoram aiawhin State Rapid Response Team member parukte chu Integrated Diseases Surveillance Programme (IDSP)-a state surveillance officer Dr Pachuau Lalmalsawma hoin an tel.

Video conference hi Coronavirus dona beihpui thlaknaa tel sorkar laipuia Health & Family Welfare hotute bakah, Ministry of  Home Affairs leh Civil Aviation & Shipping-a secretary-te'n an hmanpui bakah, Nepal ram nena ramri nei state pangaa chief secretary-te'n an hmanpui. Mizoram aṭangin IDSP hotute bakah, Zoram Medical College leh Aizawl Civil Hospital hotute an tel a ni.

Health secretary Preeti Sudan chuan, state hrang hrangte chu Coronavirus laka invennaah theihtawp chhuah tur leh a ṭul anga hma la turin a chah a; state hrang hrangte chu Coronavirus vanga damlo nia rinhlelhte hmuhchhuah leh enkawl kawngah thlawhna ṭumhmun leh lawng chawlhna neite chu a bik taka inthlahdah lo turin a chah.

Video conference-a an tarlan danin, nimin zing thleng khan Coronavirus vanga damlo hmuh chhuah zat chu China-ah mi 2,744 an awm tawh a,  mi 80-in an thih phah tawh. Thailand, Japan, South Korea, Vietnam, Singapore, Malaysia, Nepal, France, Australia leh USA-ahte Coronavirus vanga damlo mi 33 hmuh a ni tawh bawk.