Panchayati Raj Minister hoa ṭhutkhawmah Mizoram RDA Minister leh official-te an tel

Union Panchayati Raj minister Rajiv Ranjan Singh hoin nimin khan New Delhi-ah village council leh panchayati raj te tana 16th Finance Commission rawtna (recommendation) anga rural local bodies (RLB)-te'n sum an hmuh dan tur sawiho a ni a; Rural Development & Adminis-tration (RDA) minister Prof. Lalnilawma a tel.

Prof. Lalnilawma chuan, RLB Performance Grant leh State Performance Grant te ṭha taka Mizoramin a hmuh theih nan tih tur bitukte tihhlawhtlin zel an tum thu a sawi a, "Own source revenue-ah pawh Mizorama VC-te chu nasa lehzuala thuam chak mek an ni a, own source revenue aṭanga chhiah hrang hrang online-a lakna SAMARTH Panchayat Portal hmang turin kan inpuahchah mek," a ti.

Gram Panchayat Develop-ment Plan aṭanga VB-GRAMG, SBM-G leh scheme dangte nena nasa zawka thawhhona (convergence) kalpui a nih mek thu sawiin RDA Minister chuan, "Ministry of Panchayati Raj-in 15th Finance Commission hnuaia Mizoram RLB tana sum a hmuh tur zawng zawng nikum financial year-ah kan hmu kim thei a, kan lawm hle. Thingtlangah hmasawnna hna ṭha tak tak thawh a nih theih phah a ni," a ti a; 16th Finance Commission aṭangin Mizoram sorkar chuan thingtlang hmasawnna dik leh chak zawk nen Viksit Bharat 2047 a thlen ngei a beisei thu a sawi bawk.

Prof. Lalnilawma hi RDA additional secretary V Lalengmawia leh LAD director Dr Lalngura Tlau ten an ṭawiawm a ni.