Speaker-in bazar leh sikul a hawng

Assembly speaker Lalbiakzama chuan nimin khan a bial chhunga Khawlianah Bazar Shed leh Centenary Higher Secondary School building a hawng.

Khawlian Bazar Shed hi Lok Sabha MP fund Rs 24,37,500 hmanga sak a ni a, Khawlian Centenary HSS building thar chu bialtu MLA fund Rs 2,00,000 leh khawtlang thawh khawm Rs 2,20,000 hmanga sak a ni.

Assembly Speaker chuan, Khawlian chu Saitual district-a sumdawnna hmun pawimawh a nih thu sawiin, "Bazar Shed thar hian ni tin bazara eizawngte tan nasa takin hmasawnna a thlen ngei ka beisei," a ti.

Khawlian Centenary HSS hawnna inkhawmah Lalbiakzama chuan, zirna chu hmasawnna kailâwn a nih thu a sawi a; zirlaite'n hlawhtlinna an neih zel theih nan theihthawp chhuah turin thawktute a chah.