State university din turah class kalpui vat turin hmalak zel a ni - HTE Minister

Higher & Technical Education (HTE) minister Dr Vanlalthlana hoin nimin khan Planning conference hall-ah HTE Review Meeting vawi hnihna neih a ni. Minister chuan, Mizoram State University din turah class kalpui a nih vat theih nan hmalak zel a nih thu a sawi.

Dr Vanlalthlana chuan, department kal dan leh hmalakna thlirhona chuan rah ṭha a chhuah ṭhin tih a sawi a, "Official-te thawhho ṭhat azarah hmasawnna duhawm tak tak Mizoramin a hmu. Class ṭan theih turin Mizoram Engineering College kalpui mek a ni a, Mizoram State University din thar tur pawh class kalpui a nih vat theih nan hmalak zel a ni," a ti.

Zirna sang (higher education) tan theihtawp chhuah a nih thu sawiin Minister chuan, "Tun hnaiah a nghetin assistant professor 36 lak a nih bakah, RUSA assistant professor 58 dah ngheh a ni a, contract assistant professor 170 dah ngheh an ni tawh. Thawktu lak belhna, human resource tihchangtlunna hian mihringa theihna awm chu ṭangkaia hman chhuahtir a tum tur a ni," a ti a; human capital formation avangin zirlaite leh zirnaah sum peipun (invest) zel tur a nih thu a sawi.

Education consultant Rev. Dr K Thanzauva pawhin thu sawiin, "Mizoram hmasawn nan zirna a pawimawh hmasa ber a, kan ram leh hnam tan hian thil dang engkim innghahna chu zirna a ni," a ti.

Review Meeting-ah hian HTE department-a Secretariat, Directorate, Joint Directorate (Technical), PM-USHA, Mizoram Scholarship Board, College Principals' Council leh Polytechnic aiawhte'n an hmalakna leh an dinhmunte an tarlang a; hmachhawp leh hmalak dan turte sawiho a ni.