Minister-in sorkar laipui hotute a dawr

Minister of state Lalnghinglova Hmar chuan July 3, Ningani leh nimin khan New Delhi-ah Union Micro, Small & Medium Enterprises (MSME) minister Jatin Ram Manjhi, Ministry of Tourism additional secretary Suman Billa, Ministry of Minority Affairs joint secrertary Shyama Prashad Roy leh Ministry of Sports and Youth Affairs joint secretary Vineel Krishna te a kâwm.

MSME Minister nen an inkawmnaah Lalnghing-lova Hmar chuan, Mizorama enterprise tam zawkte chu MSME hnuai a nih thu a sawi a, "Mizo ṭhalai tam takin eizawn nan an hmang. Mizoram hi mihring awm zat aṭanga chhûtin ṭhalai hnathawk rual tamna, MSME lama nasa zawka ṭan lakna tlak a ni a, Bána Kaih (Handholding) hnuaiah pawh MSME kaihhnawih hmalakna tam tak a tel a ni,” a ti.

Union minister Jatin Ram Manjhi chuan, Mizorama MSME Technology Centre din chungchangah state sorkar aṭanga thehluh ṭulte tihfel a nih hunah hma a lo lakpui tur thu a sawi a; ṭhalaite tana Mizoram sorkar hmalaknate lawmawm a tih thu sawiin, Ministry of MSME aṭanga puih theihna a awm chuan a inhawn reng thu a lo hrilh.

Ministry of Tourism additional secretary nen an inkawmnaah Lalnghinglova chuan Mizorama tourism project kalpui mek leh project thar thehluh tur chungchang a thlen a; Mizorama tourist lo lutte Mizorama rei zawk châm tur leh hmun tam zawk an tlawhna tura hmalak dan tur an sawi dun.

Lalnghinglova Hmar hian Ministry of Minority Affairs joint secretary Shyama Prashad Roy leh official dangte pawh a kawm a, Ministry hnuaia Mizorama sports project hrang hrang dinhmun an thlirho. Chak zawka hna thawh a nih theih nan Ministry leh state department-a hmabak awmte sawihoin, a ṭul angin hma an la nghal niin sorkar thuchhuah chuan a tarlang.

Tourism lama hmasawnna tur leh hemi kawnga thawktute training-na tur chungchangah India Tourism Development Corporation chairman Mugdha Sinna pawh Lalnghinglova Hmar chuan a bia a; Ministry of Sports and Youth Affairs joint secretary Vineel Krishna nen Mizorama sports hmasawnna tur hrang hrangte an sawi bawk.