YMA-in ruihhlo kaihhnawih dan zir

Central YMA leh Excise & Narcotics department chuan nimin khan CYMA Hall-ah CYMA hnuaia ruihhlo dotu - Central Anti Drugs Squad (CADS) leh Zone Anti Drugs Squad (ZADS) member-te tan ruihhlo kaihhnawih dan zirhona an buatsaih.

Zirhona hi assistant secretary SF David Ngursangzuala'n a kaihruai a, CADS leh ZADS member 120 vel an tel. Excise inspector Jason Lalrinchhana leh inspector Zothantluangi Chenghrang ten ruihhlo kaihnawih a dan pawimawhte an zirtir a, zawhna leh chhanna hun hman a ni.

Hawnna inkhawma thu sawitu Peter Zohmingthanga, END joint commissioner chuan, mahni inphata YMA-te'n ruihhlo an do ṭhin chu ropui a tih thu sawiin, "Hmun hrang hranga YMA-te'n ruihhlo donaa ṭhahnem an ngaih avangin ruihhlo tawlhtute hian YMA-te hêlin, para military force-te awmna lam aṭanga ruihhlo an tawlh tam tawh zawk," a ti a; YMA leh END ten inhriatthiamna nen inthurual taka ruihhlo an doho zel a beisei thu a sawi.

CYMA general secretary Prof. Malsawmliana chuan, zirhona chu infuih tharna a ni tel tih a sawi a, "Excise leh Police te nen MoU kan nei lo nâin, kan thawhhona a ṭha em em. Keini lo hi ruihhlo dotu tur an awm chuang lo a, kan ṭanrual a, theihtawp kan chhuah a ngai. Vawiina ruihhlo dotu kal khawmte hi kan ṭanrual chuan Pathian malsawmna kan dawng zel ang," a ti.