GST registration dilnaah thil dik lo hmu

Taxation department chuan thuchhuah siamin, tun hnaiah Goods and Services Tax (GST) registration dilna ṭhen-khatah thil dik tâwk lo leh document lem hmanga dil an awm tih hmuh chhuah a nih thu thu leh Mizoram GST Act, 2017 angin hmalak dan tur ngaihtuah mek a nih thu an tarlang.

Taxation department chuan, GST registration dilnate chu uluk taka enfiah ṭhin a nih thu an tarlang a, "Tun hnaiah thil dik tâwk lo leh document lem hmanga GST registration dil an awm tih hmuh chhuah a ni. Dik lo taka registration diltu ṭhenkhat hi an sumdawnna hmun anga an sawiah hmuh tur an awm lo a, an dilnaa document an theh luhte pawh finfiah theih a ni lo," an ti a; dilna ṭhenkhatah chuan in/dawr luah tur neitute hriat lohin an hming hmangin dilna an lo thehlut ṭhin tih an sawi.

GST registration dilnaa thil dik lote chu risk-based scrutiny, data analysis leh physical verification an kalpui aṭanga hmuh chhuah a nih thu tarlangin Taxation chuan, "Mizoram Goods and Services Tax Act, 2017 danin a sawi angin hmalak dan tur ngaihtuah mek a ni," an ti.

Taxation department chuan, mipui, in neitute leh sumdawngte chu an identity document, address, mobile phone number, e-mail address leh personal information dangte GST registration atan emaw, sumdawnna dang atan emaw hmang tura dil an awm chuan hmantir lo turin an chah a; GST registration atana hman tur consent letter, rent agreement leh document dang mamawh diltute chu enfiah hmasa turin in neitute a chah bawk.

Identity document hman sualna, address hman sualna, GST registration chungchanga thil rinhlelhawm emaw hriate chu Taxation depart-ment-ah hriattir theih reng a nih thu an tarlang.