KHAWTHLIR

Statistics Day

Serchhip District Research Officer buatsaihin nimin khan Serchhip HSS-ah National Statistics Day hman a ni. Inkhawmah hian DRO pisaa thawkte leh Serchhip HSS-a zirlaite telin, district research officer Lalthangmawia’n a kaihruai a, Serchhip HSS-a lecturer Lalremruata'n statistics pawimawhna leh ram hmasawnna atana a ṭangkainate a sawifiah.

Sangha dil endik

Khawzawl DFDO Zomuansangi leh Fisheries department-a thawkte chuan nimin khan PMMSY hnuaia sangha dil siam ṭanpuina diltute an endik. Zomuansangi chuan, a hmun ngei an endik chhan chu, induhsakna tel loa ṭanpuina dawn phûte'n an dawn ngei theihna tur a nih thu a sawi.

Health Sunday Hospital Sunday

Mizoram Synod chuan naktuk July 5, Pathianni hian Health Sunday leh Hospital Sunday an hmang dawn. a, Synod aṭanga thupui thlan sa hmangin tualchhung kohhran tinin hun an hmang dawn. Kum 2008 Synod Inkhawmpui chuan Health Sunday leh Hospital Sunday chu Pathianni vawi khatah hman kawp a rel a, July thlaa Pathianni hmasa berah hman tura tiin, kum 2010-ah hman ṭan a ni. Chawhnuah Health Sunday leh zan lamah Hospital Sunday hman ṭhin a ni a; Synod aṭangin thupui thlan a ni.

Disabled Sunday

UPC (NEI) chuan naktuk Pathianni hian Disabled Sunday an hmang dawn. He ni pual hian tualchhung kohhran tinah Rualbanlo Sunday thuchah chhiar a ni dawn a, rualbanlote pualin thawhlawm lak a ni ang. Kum 2012-a UPC (NEI) Executive Board vawi 159-na rorel angin, July thlaa Pathianni hmasa berah Disabled Sunday hi an hmang ṭhin a ni.

MLA-te'n telpui

Adviser to chief minister Dr Lorrain Lalpekliana Chinzah, Lawngtlai East bialtu MLA chuan nimin khan Cenral YLA khelmualah LDFA-in rualbanlote tana Lawngtlai XI leh Mizo Professional Footballers' Association (MPFA) Charity Football Match an buatsaih a hmanpui. MPFA president Jeje Lalpekhlua, MLA leh Lunglei North bialtu MLA V Malsawmtluanga ten an telpui bawk.