Minister hlui F Malsawma vui a ni

Mizoram minister hlui F Malsawma (78) h/o Zoramthangi, Chaltlang chu July 4, Inrinni zan dar 7:30 khan Trinity Hospital-ah a thi a, nimin chhun khan Chaltlang Kohhran Centenary Hall-ah vui a ni.

F Malsawma hi October 2, 1947-ah Zanlawn khuaah a piang a, kum 1972-ah MA a zo a, kum 1973 aṭangin Pachhunga College-ah zirtirtu hna a thawk. Kum 1974-ah Zoramthangi, Chaltlang nen inneiin, fapa pahnih leh fanu pakhat an nei.

June 1975 khan F Malsawma hian PC Party a zawm a; Mizoram union territory a nih lai, kum 1978 inthlanpuiah Suangpuilawn bialah PC ticket-a thlan tlin niin, cabinet minister a ni. Minister a nih hian kum 30 leh thla 9 mi a ni. Kum 1979 inthlanpuiah Suangpuilawn bialah bawk MLA atan thlan tlin a ni leh a, cabinet minister a ni leh bawk. PC sorkara minister a nih lai hian Education (Social Welfare, Sports, School Education, Higher & Technical Education), Cooperation leh Industries department-te a enkawl.

Mizoram state a nih hnu, kum 1993 leh 1998 inthlanpuiahte MNF party ticket-in Aizawl North-II bialah MLA atan thlan tlin a ni. Kum 1998 inthlanah hian MNF an sorkar a, minister niin, School Education, Health & Family Welfare, Tourism, Information & Public Relations leh Law & Judicial department-te enkawl. Kum 2015 khan politics a chawlhsan a ni.

Governor Gen. Vijay Kumar Singh, chief minister Lalduhoma leh ram hruaitu eng emaw zatin F Malsawma uina leh sûnna thu social media-ah an tichhuak a ni.