Larsapin MHIP Day duhsakna a hlân

Vawiin hi Mizo Hmeichhe Insuihkhawm Pawl (MHIP) din champha a ni a; Governor Gen. Dr Vijay Kumar Singh chuan MHIP Day thuchah tichhuakin, duhsakna a hlan a, Mizoram hmasawn (Viksit Mizoram) siam turin MHIP member-te an pawimawh thu a tarlang.

Governor chuan, MHIP chuan din a nih tirh aṭangin hmeichhia leh khawtlanga dâwm kân ngaite dikna leh zahawmna humhim tur leh an hmakhua ngaiin ṭhahnemngai takin a thawk ṭhin tih a sawi a, "Mizo hnam ziarâng, nunphung hausa tak bakah pi pu aṭanga kan thil rochunte vawng him chung zelin khawtlang hamṭhatna leh ram hmasawnna turin nasa takin hma a la ṭhin a ni," a ti.

Mizo hmeichhiate an pawimawh thu sawiin Larsap chuan, "MHIP member-te hian Viksit Mizoram siam tura hmalaknate a hlawhtlin theih nan an pawimawh hle a, Viksit Bharat 2047 siam tura Prime Minister hmathlir tihhlawhtlin kawngah an thawh hlâwk ngei ang," tiin a tarlang.

Gen. VK Singh chuan, hmeichhiate leh naupangte hamṭhatna tur sorkar scheme-te hlawhtling taka kalpui a nih theih nan MHIP-te'n sorkar, NGO dangte leh khawtlang mipui ṭha takin an thurualpui zel a beisei thu a sawiin a, "Hmeichhiate hi nunphung zir ṭanna, thil ṭha engkim inhrilha seilenpuina leh ram hmakhaw hun thui tak hriltu, chhungkaw tinte innghahna ban pawimawh tak an ni," a ti.

MHIP-in kum 50 chuang hmeichhiate dikna vawn him, tharum thawhna leh enhranna thleng thei laka ven bakah, inneih, inṭhen leh rokhawmna dan ennawn kawngah nasa takin thâ an thawh ṭhin thu Larsap chuan a tarlang bawk.