Central Jail-a tángte inkhawmpui

Synod Prison Ministry (SPM) chuan nimin khan Central Jail leh Cenral Women Jail-ah inkhawm an buatsaih a, chief minister Lalduhoma'n a hmanpui.

Chawhmaah Central Jail-ah hun hman niin, SPM director Rev. Lalhleia'n a kaihruai a, Prison inspector general R Vanlalsawta'n thuchah tawi a sawi. CM Lalduhoma pawhin thu sawiin, jail tángte chu chhan hrang hrang vanga táng an nih angin, an nun zar pêng zinga rah lote an sah thlak ngam a, chhelna leh tumruhna hmanga mi puitling an nih theih thu a sawi.

Chawhnuah Central Women Jail-ah inkhawm a ni a, SPM Director-in kaihruaiin, Chief Minister leh Prison IG ten thu an sawi. CM chuan, hmeichhia táng zingah heroin no. 4 vanga táng an tam thu sawiin, "Hei hi kan awm rengna tur a ni lo a, kan sim chuan Pathianin min ngaidam thei a ni," a ti.

SPM hruaitute chuan, Central Jail-ah mi 880 an táng mek a, Central Women Jail-ah mi 132 an táng mek tih an sawi.