EU-in CAA dodalna resolution an duang - MPC President

Mizoram Peoples Conference (MPC) party offce bearer-te chu nimin khan an party pisaah an president Lalhmangaiha Sailo hoin an ṭhukhawm a, India Constitution Preamble an sawi rual. MPC President chuan, European Union-in Citizenship Amendment Act (CAA) dodalna resolution an duan thu a sawi.

Lalhmangaiha Sailo chuan, January 26, 2020 khan European Union (EU) lawmaker mi 154-te'n BJP kaihhruai sorkarin CAA an pass dodalna resolution draft an siam thu a sawi a, "India sorkarin civil leh political rights a bawhchhiaa an ngaih thu te, international human rights treaty-te vawngtu a nihna thlauhthla a, CAA chu sakhaw inthliarna duhawmlo tak thlentua an ngaih thu resolution draft an ziahah an tarlang," a ti.

MPC OB meeting chuan, Bangladesh aṭanga dan loa Mizorama lut ru Chakma-te ngawrh taka dap chhuak a, thawn kîr hna rûnpui tharthawh leh turin Mizoram sorkar an phût tih an tarlang bawk. Media report-a a lan danin, January 25, 2020 khan Brussels, Belgium-ah EU lawmaker mi 154-te ṭhukhawm chuan CAA dodalna 'Anti CAA resolution' an duang a, phek 5-a chhah niin, tun kara Brussels-a European Parliament-a EU plenary session-ah pharh tum a ni.

EU lawmaker-te chuan CAA chu khawvela buaina leh harsatna thlen thei leh mi tam takin an tawrhna thlen theiah an ngai a; an resolution duanah chuan, CAA chu mihring indiriamna leh inṭhen darhna thlen theituah leh, International Covenant on Civil and Political Rights (ICCPR) hnuaia India-in 'international obligations' a neih leh human right lama inremna (treaty) hrang hrang India-in a lo pawm tawhte bawhchhiatnaah ngaih a nih thu a chuang bawk.