Ruihhlo donaah thapui thawha ṭan mar sauh sauh a ṭul - Home Minister

Home minister K Sapdanga chuan, Mizo ṭhalaite ruihhlo laka veng tur leh, ruihhlo ti mekte chhan chhuak tur leh, ruihhlo donaah ṭhapui thawha ṭan mar sauh sauh a ṭul thu sawiin, chuta tan chuan hmeichhia, chhungkaw nute an pawimawh thu a sawi.

K Sapdanga hian nimin khan a biala MHIP, Electric Veng Branch-in MHIP Day an lawm a hmanpuinaah thu sawiin, "Fanau enkawlah leh khawtlang siamṭhatnaah NGO-te nen sorkarin hma kan la chho mek a, zawi zawiin hma kan sawn chhoh a beiseiawm. Kan ṭhalai tam tak ruihhlo vanga kan vui liam zut zut lai hian nasa zawka ṭan kan khawh a ngai a, kohhrante nen inlungruala ṭhapui thawha kan ṭan mar sauh sauh a ṭul," a ti.

Khawtlang nunah nute an pawimawh hle tih sawiin Minister chuan, "Khawvel hian nu ropuina a ngaihlu tulh tulh dawn a, Mizoramah MHIP ṭha tak din a ni hi a vanneihthlak. Kohhrana sawi remchang chiah lo thil tam tak inzirtirna hmun NGO ṭha tak tak kan nei hi hnam dang leh khawvel danga kan hmuh loh leh an neih loh Mizo ro hlu a ni," a ti a; NGO-te chu sorkar, kohhran leh khawtlang tan an ṭangkai thu a sawi.

K Sapdanga chuan, sorkarin ruihhlo a buaipui nasa tih sawiin, "India ram leh ram pawnah ruihhlo thawn chhuah tur kal khàn ber kan nih avangin sorkara mawhphurtu lam pawhin theihtawp an han chhuah. Police leh Excise chakna ngawt chuan do hneh rual a ni lo a, ramri hrûla khaw 23-ah YMA branch-te nen thawhhona ṭha tak kan nei a, nasa takin ruihhlo donaah min pui a ni," a ti.

Home Minister chuan, MHIP thupui pawimawh tak chu mite ṭanpui tih a nih thu sawiin, "Thil ṭha tih hi a chhuanawm a, thil ṭha tih dan awlsam ber chu ṭanpui ngaite ṭanpui a ni," a ti a; pawl leh mimal angin an theih chinah MHIP Day puala ṭanpui ngaite ṭanpui turin mi tin a sáwm.

Thiam lo tak chungin ram tana rawngbawl turin ke an pên thu sawiin K Sapdanga chuan, "Ka tlin lohna leh fel lohna tam tak a awm tih ka hria a, in mi finchhuah ka ngai tak meuh a ni," a ti a; a bial, ram leh khawtlang tana ṭangkai taka a awm zel theih nana thawhpuiah a sáwm.

MHIP Day lawmna inkhawm hi Electric Veng Branch MHIP president R Lalhnehpuii'n a kaihruai a, bialtu AMC corporator Dr Lallawmkimi Tochhawng pawhin thu sawiin, MHIP member kum 70 chin chung lamte hnenah chawimawina hlan. Tlaiah chawhlui kilho nghal a ni.