Sorkar sikul-ah an fate dah uar turin Minister-in nute a chah

Minister of state Lalnghinglova Hmar chuan nimin khan a biala Tuikual North MHIP-in MHIP Day an lawmna a hmanpui a; primary school aṭanga an fate sorkar sikula dah uar turin nute a chah.

Lalnghinglova Hmar chuan, mi dang tana MHIP-te inpekna leh chhiatni ṭhatnia an inbuaipui dan chu fakawm a tih thu a sawi a, "Mizote tan nu dinhmun hi a pawimawh a, nu ṭha tak leh fate tana nu nih tling tak hmeichhia an pun zel ka beisei. Nute hian zirna kawngah fate hawitir u la, sorkar sikulte hi an duai bik lo a, an ṭha tawk hle. High school aṭang mai ni lo, primary school aṭangin fate sorkar sikulah dah i uar ang u," a ti.

Mizoramah hmei-chhiate an pawimawh thu sawiin Minister chuan, "Tun hnaia AMC election-ah khan hmeichhe voter chu 54% vel ang an ni. Mizoramah mipa ṭhalai thi an tam lutuk hi a pawi a, hemi kawnga hma la turin MHIP, YMA leh kohhran ṭanho a ngai," a ti a; ram leh hnam dinchhuahna atan chhungkuaa inenkawlna a pawimawh tih a sawi.

Inkhawm hi Tuikual North MHIP president Rita Lalparpuii'n a kaihruai a; kum 2025-26 chhunga an member thi mi 14 sûnna hun hman a nih bakah, an veng tihmingṭhatu leh MHIP life member-te hnenah chawimawina hlan a ni.