Deputy Speaker hoin MHIP jubilee lawm

Assembly deputy speaker Lalfamkima chuan nimin khan Kolasib Diakkawn YMA Hall-a MHIP Diakkawn Branch golden jubilee lawmna a hmanpuinaah thu sawiin, fate enkawlna leh zu leh ruihhlo dona kawngah nute chu khawtlang leh chhungkuaah an pawimawh thu a sawi.

Lalfamkima chuan, MHIP-in hun rei tak chhung hmeichhe dikna leh chanvo humhalh kawngah leh an dinhmun chawikang turin hma a lak nasa thu a sawi a, "Fate enkawlna leh zu leh ruihhlo donaah nute hi khawtlang leh chhungkuaah an pawimawh em em a, fate nunphung siamtu leh an tana entawn tur hmasa ber an nih avangin nute'n an fate chu nun ṭha leh dik zawkah an kaihruai nasa hle a ni," a ti.

Zu leh ruihhlo vanga chhungkaw keh chhe tur leh ṭhalai tam tak nun chhiatna lakah nute chu venghimtu banpui pawimawh tak an nih thu Lalfamkima chuan a sawi a; an fate leh an hmangaih chu ruihhlo laka fihlim turin thu ṭha hrilhin zilhna an pe a, khawtlang himna kawngah pawh nu te hi rintlak leh pawimawh tak an nih thu a sawi bawk.

Jubilee lawmna inkhawm hi MHIP, Diakkawn Branch president Sanghming-thangi'n a kaihruai a, an member thite sûnna hun hman a ni. Diakkawn VC leh YMA aiawhte pawhin thu sawiin, Kolasib District Legal Services Authority-in dan lam inzirtirna (legal awareness) hun an hmang a; tlaiah jubilee ruai an ṭheh a ni.