MHIP Day vawi 53-na lawm a ni

Mizo Hmeichhe Insuihkhawm Pawl (MHIP) din champha, MHIP Day vawi 53-na chu nimin khan Mizoram hmun hrang hranga branch-te'n hlim takin an lawm. MHIP hi July 6, 1974 khan din a ni.

MHIP Day hi MHIP branch hrang hrangin an lawm a, branch tam ber chuan inkhawmin hun an hmang. Infuih tharna atan te, intihhlimna hun atan te, khawtlang tana thil ṭha tihna atante hman a ni a; MHIP General Headquarters-a hruaitute'n branch hrang hrangah an hmanpui.

MHIP Gen. Hqrs president Lalliani chuan Khatla Branch-ah a hmanpui a; Mizo hmeichhiate'n tun aia hma an sawn lehzual theih nan mi tin an pawimawh thu sawiin, hmeichhiate zingah a tlingte chu induhsak a, a theih ang anga inhlankai nachang hriat a ṭul thu a sawi a; MHIP thiltum ber ‘Mite ṭanpui’ a nih angin, MHIP Day puala mi dangte tan malsawmna thlentu ni ṭheuh turin Mizo hmeichhiate a sáwm.

Lalliani chuan, Central YMA-in ruihhlo an do chu MHIP-in an thlawp thu sawiin, ruihhlo chu Mizoram hmelma lian a nih avangin ruihhlo donaah theihtawp chhuah zel turin MHIP member-te a sáwm a; ruihhlo leh a kaihhnawih laka inthiar fihlim turin hmeichhia zawng zawng a ngen bawk.

MHIP Day lawmna hun hi Mizoram sorkara minister leh MLA te, Aizawl Muncipal Corporation-a corporator ten an hmanpui a ni.

MHIP-ah hian sub-headquarters 10, joint MHIP pariat, block 30 leh branch 766 a awm mek a; member 2,80,000 vel an awm mek bawk.