KHAWTHLIR

Thisen pe

Nimin khan KṬP, Leitan Branch chuan Synod Hospital tan thisen unit 25 an pe a, petute mipa 22 leh hmeichhia pathum an ni. Pentecostal Youth Department (UPC NEI) Lunglei Luangmual Section pawhin nimin khan Lunglawnah Lunglei Civil Hospital tan thisen unit 20 an pe a, petute mipa 15 leh hmeichhia panga an ni.

Siahaah MHIP Day

MHIP Sub-Headquarters, Siaha chuan nimin khan Siaha MADC Golden Jubilee Hall-ah a huhoin MHIP Day an lawm a, MADC-a member of district council (MDC) ST Vanmalsawmliana'n a hmanpui. Inkhawmah hian MHIP member-te bakah, Social Welfare, Law & Judicial, LESDE leh Women and Child Development department hotu te, YMA Sub-Hqrs, Mara Chano Py leh Lai Women Association Sub-Hqrs hruaitute'n an hmanpui bawk.

Truck chesualah mi pakhat a thi

Nimin zing dar 5 vel khan Khawbung aṭanga Tuipui lei thlen hmaah truck pakhat chesualin, kawng thlangah a tla a, truck khalhtu Lalzova (33) h/o Vanlalruatpuii, Champhai Kanan Veng a hmunah a thi. Thu dawn danin, truck-ah hian a khalhtu Lalzova chauh a chuang a, culvert bul kawng kualah kawng thlang lam lei nêm dai pialin kawng thlangah a tla a ni. Chetsualna hmunah hian Dungtlang police-te an kal nghal a, dan anga tih ngaite an tihfel hnuah Champhai panpui nghal a ni.

SP Mukherjee Pian cham lawm

BJP, Mizoram Pradesh chuan nimin khan Aizawla an pisaah Dr Shyama Prasad Mukherjee pian champha vawi 125-na an lawm. An general secretary Delson Notlia chuan, BJP-in India ram hmangaihna aṭanga rawng a bâwl ṭhin avangin Mizoram thlengin tun hmaa state ensan ang hial ni ṭhinah hmasawnna tam tak a luan luh thu a sawi a, "Development nasa lehzuala kan hai luh zel theih nan leh Central-in min rin ngamna atan BJP hi kan thawhpui thiam a ṭha," a ti.