Congress hi SHC-a Remna thlentu a ni - MPCC

Mizoram Pradesh Cong­ress Committee (MPCC) Media depart­ment hruaitute chuan In­rinni khan Aizawl Press Club-ah thuthar thehdarhtute an kâwm a; Congress party chu Sin­lung Hills Council (SHC) chhunga remna leh muanna thlentu an nih thu an sawi.

MPCC Media chair­man Lallianchhunga chuan, "SHC huam chhunga remna leh muanna thlentu chu Congress party hi a ni. SHC dintu leh a neitu chu Congress party kan ni a, chuvang chuan, Congress leh a thawhpuite'n mipui thlan chhuahte hmanga sorkar hmasa ber siam kan tum," a ti.

Lallianchhunga sawi danin, Congress party-in HPC-te July 27, 1994-ah inremna a siampui avangin remna leh muanna a awm a, mahse, inremna chuan harsatna hrang hrang a tawh avangin duhthusamin a hlawhtling lo. HPC(D) ding zuiin, kum 1995 aṭangin buaina a inṭan leh a, HPC(D)-te chu Congress sorkarin April 2, 2018-ah inremna thuthlung a ziahpui leh a ni.

Sorkar leh HPC(D) inremna avangin SHC din a ni tih sawiin Lallian­chhunga chuan, "Tunah hian remna leh muanna hnuaiah inthlanna felfai leh muanawm tak kan nei thei dawn ta a, kan lawm hle," a ti. Congress sorkar vêkin New Capital Complex-ah cheng nuai 272 séngin SHC office a sa zo tih sawiin, "SHC hmasawnna duh tak taktu chu Congress party a ni a, Congress party chuan SHC mipui zawng zawng sorkarna siampuiah a sáwm a ni," a ti.

MPCC Media Chair­man chuan, MLA inthlana HPC nen inremna an siam angin SHC inthlanah chuan Congress party-in HPC candidate-te thlàwp an tum tih sawiin, "HPC hruaitu ṭhenkhat hamṭhat­­na duhtute'n MNF rîm kualin MNF an thawhpui daih a ni," a ti a; chuvang chuan Congress party chuan hmanhmawh takin can­didate an siam thu a sawi. 

MNF campaigner ṭhenkhatte'n MNF leh an thawhpuite an thlan tlin loh chuan hmasawnna lama hrêkah mipui vau an chíng tih sawiin Lal­lianchhunga chuan, "Hetiang hi ṭha lo kan ti a, mipui zah lohna a ni. SHC hian budget hran a nei dawn. State sorkarin a duh duha a hrêk theih a ni dawn lo, mahnia ro inrèl tur a ni. SHC chhunga hmasawnna chu SHC rorêl khawl kuta awm tur a ni a, state sorkarin a duh duha a rah hruala a hrêk theih a ni lo," a ti.

Lallianchhunga chuan, MNF minister-te'n SHC inthlan cam­paign-naa sikul naupang an khâwm ṭhin chu Model Code of Conduct bawhchhiatna a nih thu sawiin, "Hei hian MNF party-in SHC area-ah mipui an neih lohzia leh pawisak an neih lohzia a lantir chiang hle," a ti a; MNF leh HPC thawkhoin, MNF seat pasarih, HPC seat pangaa an insem chuan HPC area-ah MNF sorkar dinhmun a derthâwng tih a lantir niin a sawi.

MPCC Media Chairman chuan, SHC inthlan November 5-a neih turah INC chuan candidate paruk, party dangte nen thawhhona bial pali leh INC candidate siam loa independent candidate thlawpna an neih nual thu a sawi bawk.