ZPM-in SSA leh RMSA zirtirtu lâk tawhte advertisement chhuaha lâk ṭhat an phût

Zoram Peoples Movement (ZPM) Vigilance department leh ZPM ṭhalai hruaitute chuan, advertisement chhuah loa SSA leh RMSA hnuaia thawk tur zirtirtu 91 lak tawh chu advertisement chhuaha lak ṭhat leh an phût thu leh, a rang thei ang bera recruitment rules (RR) siam an phût thu an puang.

ZPM hruaitute hian Inrinni khan Aizawl Press Club-ah thuthar thehdarhtute an kâwm a; "Advertisement loa SSA leh RMSA zirtirtu lâk tawh 91-te hi advertisement chhuah ngeiin Mizoram sorkar hian la ṭha leh se, a rang thei ang berin RR pawh siam rawh se," an ti.

ZPM Vigilance department secretary James C Lalnuntluanga chuan, MNF leh Congress party-te chu Sarva Shiksha Abhiyan (SSA) leh Rashtriya Madhyamik Shiksha Abhiyan (RMSA) zirtirtu tur lak danah an inpuhmawh mek tih sawiin, chu chuan kum 40 vel sorkarna chelh tawh political party-te'n RR mumal an siam miah lo tih a tihchian thu a sawi.

MPCC Media department-in October 23, 2019-a thuthar thehdarhtute hnena an sawi danin, RTI Act hmanga zawhna chhannaah December 2018 aṭanga September 2019 chhungin SSA leh RMSA-a zirtirtu lak 123 zingah advertisement chhuah loin RMSA zirtirtu 55 leh SSA zirtirtu 36 lak a nih thu an tarlang tih sawiin James Lalnuntluanga chuan, "A dik lo tih hre reng chunga an palzam chuan nakin zelah a pawi dawn... Hei hi ngawihsan mai kan tum lo a, ZPM chuan politics chhia khelh nan zirna hman kan tum ve lo," a ti.

James Lalnuntluanga chuan, Congress sorkar lai April-October, 2015 chhungin advertisement chhuah lo leh tling lo chungin SSA zirtirtu 58 lak a ni ve tho tih sawiin, "MNF sorkarna hnuaia lakte chu la siamṭhat theih a nih avangin tling lo na nâ nâ chu siamṭha leh ngam rawh se. MNF sorkar hian an thil tih dik lohah Mizoram mipui hnenah ngaihdam dil se, siamṭha leh ngam rawh se," a ti a; dik taka an tih phawt chuan ZPM chu MNF sorkar hnung dâwltu tur an nih thu a sawi.

ZPM hruaitute chuan, "Sorkar hian huaisen taka inenfiahna tur leh siamṭhat ngaiahte insiam ṭha ngam tur te, ram hma lam hun neitu zirlai naupangte enkawltu tur zirtirtu lak danah RR mumal tak nei ngam loa Mizoram sorkar kal tawhte an awm zel mai hi ZPM chuan a pawi a ti a. MNF sorkar hian Mizo mipuite hi fahrawn ang ni loin, fa tak kan nihna ang ngeia enkawl tawh turin kan phût a ni," an ti.

ZPM hruaitute hian tun hnaia zirtirtu lâknaah chief minister Zoramthanga, Assembly speaker Lalrinliana Sailo, minister R Lalzirliana leh School Education minister Lalchhandama Ralte te chu an inrawlh a, an duhsak zawngte lak an nih theih nan qualification-a tling lo pawh tling angin an tihsak tih an sawi a ni.