Save Vailui Project hnatlang huaihawt

Khatla South Local Council chuan 'Save Vai­lui Project 2019' an kalpui turah a vawi khat nan November 2, Inrinni khan hnatlangpui an huaihawt a; mi 390 thawk chhuakin, bawlhhlawh ṭawih thei lo ip 403 leh satha ip chi hrang hrang ip 45 khat an chhar khawmte chu an paih.

Save Vailui Project 2019 hnatlang hmasa ber hi bialtu MLA VL Zai­thanzama, chief secretary Lalnunmawia Chuaungo, bialtu councillor Lal­hming­mawia leh AMC councillor dang K Romawia, PHE secretary Amjad Tak leh PHE department hotu dangte'n an hmanpui a ni.

VL Zaithanzama chuan, Vailui thenfai hna thawk tura Khatla South LC leh veng mipuite'n hma an hruai chu Aizawl khawpui tan thil lawm­awm tak a nih thu a sawi a, "He thil hi ka veina a rei tawh a, kan tui tlan ber Tlawng lui hnár tifai zui zel turin hnatlanga thawk chhuak mipuite ka sáwm a, nakin zelah pawh hma thar lain huang kan zauh zel ang," a ti a; hnatlanga a ṭul anga hman atan Rs. 5,000 a thawh.

Chief secretary Lal­nun­mawia Chuaungo chuan, "Khatla South LC-in Save Vailui Project in duang chhuak hi sorkar ang pawhin lawmthu ka sawi a. Tuna Vailui thenfai hna hi vawi khata zawh tur a ni lo a, vawiin hi a bul ṭanna chauh a ni," tiin, Vailui hrûla in leh lo neite pawhin lui tibawlhhlawh zel lo zawnga hma an lak a ngaih dawn thu a sawi.

Bialtu AMC councillor Lalhming­mawia chuan Save Vailui Project 2019 an kalpui avanga lawmthu sawi nan Khatla South LC hnenah Rs. 20,000 a pe a ni.