Party leh mimal induhsakna tel loa police lak vangin MPSOA an lawm

9th July, 2026

Mizoram Police Subordinate Officers' Association (MPSOA) chuan thuchhuah siamin, Mizoram sorkarin political party leh mimal induhsakna tel loa police a lak avangin an lawm thu an tarlang a; police lak leh turah pawh dik taka ti zel turin sorkar an ngen.

MPSOA chuan, Mizoram sorkarin tun hnaia sorkar hnathawk a laknaah dik takin a thiam leh a tlingte chauh a la ṭhin chu lawmawm an tih thu an tih tarlang a, "August 25, 2025 aṭanga training mek Mizoram Police constable 259 laknaah party leh mimal induhsakna tel hauh loin, a tling leh ti ṭhate ngei lak an ni kha lawmawm kan ti tak zet a, Mizoram sorkar chungah thinlung takin lawmthu kan sawi a ni," an ti.

Mizoram Police Manual 2005 hman hnua a vawi khatna atan, kum 19 ral hnuah Mizoram Police Manual 2005 ang takin HSLC pass chinte constable atana lak an ni chu Mizoram Police tan hmasawnna mêllung pawimawh a nih thu MPSOA chuan an sawi a; sub-inspector (unarmed branch) 25 lakna tur, approval awm tawhah pawh dik tak leh huaisen taka ti zel turin sorkar an ngen.

MPSOA chuan, subordinate level rank hrang hranga post ruak - SI (UB) 62, ASI (UB) 33, constable (UB) 756, ASI (Ministerial) 120, MPRO (head constable 230, constable 32), FES 57 & constable (AB) 2,757, a vaiin 4,047 vel awm mek chu hnawhkhah thuai an duh tih an sawi a, "Hma min laksak thuai turin sorkar kan ngen," an ti.

Mizoram sorkarin ‘Assistance to States and Union Territories for Modernisation of Police’ (ASUMP) kaltlanga Mizoram Police hman tur lirthei thar 219 lai June 18, 2026-ah a pe chu ropui an tih thu an tarlang a, "Hei hian police thâ nasa takin a tichak," an ti a; lirthei thar ṭhahnem tak an neih chuan rîkrum thil, hnuchhuina leh sual donaah chak zawkin hma an lak theih tur thu an sawi.

MPSOA chuan, hmasawnna thar tam tak Mizoram Police-in an neih theihna tura theihtawp chhuaha hma latu te, a bikin Chief Minister, Home Minister leh Home department officer leh thawktute chungah te, Police Headquarters-a hotute chungahte lawm thu an sawi bawk.