CADC-ah BJP leh ZPM sorkar a piang; CEM atan Nirupam Chakma lak luh a ni

Chakma Autonomous District Council (CADC) term 11-na kal mekah nimin khan BJP leh ZPM sorkar inṭâwm a piang a; chief executive member (CEM) atan Nirupam Chakma, BJP lak luh a ni.

Sorkar lak luh inkhawm hi CADC Art & Cultural Hall, Chawngte-ah buatsaih a ni a, CADC executive secretary Pronit Bikash Chakma-in a kaihruai. Lawngtlai bawrhsap Donny Lalruatsanga'n Nirupam Chakma chu CEM atan rinawmna thu tiamtirin a la lut a ni.

CADC-ah hian elected MDC seat 20 a awm a, MDC 10 nei BJP leh MDC pakua nei ZPM te chuan Chakma Democratic Alliance an din a, sorkar inṭâwm an siam a ni.

CEM thar Nirupam Chakma chuan, zirna, kawlphetha, kawngpui ṭha, thalaite tana hna thar siam te a ngaih pawimawh zual dawn thu a sawi a; CADC hmasawnnatan theihtawp an chhuah tur thu sawiin, ṭhahnemngai taka sorkar ṭawiawm turin CADC mipui, VC, tlawmngai pawl leh kohhran te a sáwm.

Nirupam Chakma chuan, CADC-ah sorkar ngêlnghet a awm theihna tura hma latu - Mizoram Governor, Chief Minister, DCMA Minister leh Chakma Democratic Alliance Legislature Pary te chungah lawmthu a sawi a; huapzo, langtlang leh mipui sorkar din turin hma an lak dawn thu a sawi.

CADC CEM lak luhnaah hian District Council & Minority Affairs minister C Lalsawivunga, Bihar Legislative Council member Devesh Kumar, CADC MDC leh MDC hlui te, sorkar official-te leh mi pawimawh dangte an tel a ni.