NH leivung paihna tur sawiho

Kolasib District Level Monitoring Committee chu an chairman H Dolianbuaia kaihhruaiin nimin khan an ṭhukhawm a; National Highway zauh leh siamṭhat meka Vairengte-Mualkhang inkar kawng (Package 3-7) huam china leivûng paihna tur Muck Disposal Plan chungchang an sawiho.

Muck Disposal Plan hi EPC contractor-te'n package tin atana leivûng paihna tur hmun (muck disposal site) an duante a ni. Leivung paihna tura hmun thlan zinga ṭhenkhat chu ṭhutkhawmah hian pawm a ni a, hmun ṭhenkhat erawh chu uluk zawka enfiah leh tura tih a ni. Leivûng paihna hmunah hriattirna (signboard) târ ngei ni se, an ti.

Ṭhutkhawmah hian village council aiawhte chuan contractor-te fimkhur lo taka leivûng an paih vanga harsatna an tawh ṭhinte an sawi chhuak. Bawrhsap chuan, contractor-te chu fimkhur taka hna thawk tur leh muck disposal plan anga hmun ruatah ngei leivung paih ṭhin turin a hrilh a ni.