MYC-in tin enkawl zirna a buatsaih: Beauty industry-ah mamawhna a nasa - MYC Chairman

Mizoram Youth Commission chuan nimin khan MYC Auditorium-ah a thlawna tin enkawl zirna, 'Nail Technician Training' an buatsaih ṭan a, MYC chairman Malsawmzuala Ralte-in hawngin, tunlaiah beauty leh wellness-ah thawktu mamawhna a nasat thu a sawi.

Malsawmzuala Ralte chuan, mamawhna phuhru tur leh Mizoram ṭhalaite tana mahni kea dinchhuahna (self-employment) siamsak nan tin enkawl zirna duan a nih thu a sawi a, "Tunlai nunphung inthlak zelah beauty and wellness industry-ah mamawhna a nasa lehzual. Training hi eizawnna nghet neih theihna tura ruahman a ni," tiin, tin enkawl zir turte chu an kal zelna turah duhsakna a hlan.

Nail technician training tur hian mi 54 thlan an ni a, batch hniha kalpui tur niin, thla khat ve ve zirtir an ni dawn. Batch hmasa zawkte'n nimin khan training an ṭan a, batch hnuhnung zawkte'n August 3, 2026-ah training an ṭan ve leh ang.

Tin enkawl zir tura thlante hi ṭha taka kal tura beisei an ni a; attendance 80% chung lam nei chinte chu eizawnna bul an ṭanna atan an mamawh tur hmanraw chi hrang hrang MYC-in a pe dawn a ni.