Forensic-in kum chanve chhungin thubuai 702-ah thil 4,440 an endik

Forensic Science Laboratory (FSL) chuan kumin kum chanve, January-June chhung khan thubuai 702-ah thil chi hrang hrang 4,440 an endik a; kum 26 leh thla 6 kal ta chhungin thubuai 17,304-ah thil chi hrang 1,89,794 an endik.

FSL Achievement Report-in a tarlan danin, kum 2000 aṭanga June 30, 2026 inkar, kum 26 leh thla 6 chhung khan thubuai chi hrang hrang 17,304-ah thubuai kaihhnawih thil chi hrang 1,89,794 endik tur hian pawikhawihna hmun 1,975-ah an kal a; an thil endikte kaihhnawihah vawi 5,196 court-ah an inlan.

Forensic expert-te hian pawikhawihna hmunte endikin, finfiahna awm theite an la khawm ṭhin a; court, Police, Excise & Narcotics leh department hrang hrang aṭanga endik tura tih bakah, Mizoram pawn aṭanga case rawn thawnte an endik ṭhin.

An laboratory aṭanga kutzia (fingerprint) an endik aṭangin pawikhawihnaa inhnamhnawih mi 5,982 an hmu chhuak tawh a, chu'ng zinga 3,373 chu thiam loh chantir an ni tawh.

Mizoram Forensic Science Laboratory hi kum 1998 khan CID (Crime) hnuaiah branch pakhat anga din niin, July 31, 2000 khan Police Headquarters hnuaiah dah a ni a; March 13, 2015 khan Home department hnuaiah directorate-ah hlan kai a ni.