KHAWTHLIR

MNYF president thar ruat a ni

MNF president Zoramthanga chuan July 7, Thawhlehni khan Mizoram National Youth Front (MNYF) president atan Gogo Lalremtluanga, Mission Veng a ruat. Gogo Lalremtluanga hian Robert Romawia Royte, MLA a thlak dawn a ni. MNF President chuan MNYF vice president atan Lalnunmawia Pautu, Bawngkawn a ruat nawn a, treasurer-ah chuan Lalhmingthanga, Chaltlang a ruat bawk.

Scho' sem hnai

Mizo Students’ Union hruaitute chuan nimin khan Mizoram Scholarship Board (MSB) under secretary Joseph L Hauhnar an hmu a, scholarship chungchang an zawt. Scholarship 2025-26 atan sorkar laipui aṭangin June 23, 2026-ah mother sanction cheng nuai 40,775 an dawn tawh thu te, state sorkarin a tihfel thawkhat tawh thu te, July 15, 2026 ral hmain sem ṭan hman beisei a nih thute a lo hrilh tih MSU chuan an tarlang. Scho' diltute chu an bank account leh Aadhaar thlun zawm ngei turin MSU chuan an chah a ni.

M-PACS sawiho

Khawzawl District Cooperative Development Committee chu nimin khan an ṭhukhawm a, bawrhsap K Vanlalṭhiana'n a kaihruai. Khawzawl district-ah cooperative society 48 an inziah luh thu te, society nung (function) ṭha 35 leh function ṭha lo 13 a awm thu tarlan a ni. Computerization of PACS Project Phase-III kalpui nan Kawlkulh, Chawngtlai, Khawzawl Darngawn, Lungtan leh Tualpui M-PACS-te thlan an ni.

Ui man lilâm theih

Mamit district magistrate Suvigya S Chandra chuan thupek chhuahin, Mamit district-ah mi dang tana harsatna siam leh hnawksak zawnga ui vulh khap a nih thu a puang. Ui chhuah zalen khap a nih thu te, khawlaia ui chhuahpui dawnin hrui rinawm taka hlinga kaih tur a nih thu te, ui zun leh êk khawlaiah hnutchhiah loh tur a nih thute a tarlang. Khawlaia ui chhuakte chu VC-te'n an man theih thu leh ni sarih chhunga a neitute'n an khul loh chuan lilâm tur a nih thute a tarlang bawk.

Ngaizel kawng khâr

Nimin khan Ngaizela K Lalnghakliana Filing Station bulah lung a tla a, lirthei delh chhiat nei mah se, mihring thi leh hliam an awm lo. Aizawl District Disaster Management Authority ruahmannain a remchan angin then fai a ni dawn a, hna thawh chhungin Kulikawn-Saikhamakawn via Ngaizel kawng khar a ni dawn tih Traffic SP C Vanlalvena chuan a tarlang. Ngaizel kawng hi Tlangnuam lamah hêl tur a ni a, MMV chin chung lam kal phal a ni lo thung.