Bru lâk lêt kal mek tihtawp phûtin Tripura-ah Bru-te'n kawngpui an dang
Mizoram Bru Displaced People Forum (MBDPF) huaihawtin Tripura refugee camp-a Bru-te chuan Mizorama hruai kír hna kal mek tihtawp an phût vang leh sorkar laipuiin Bru camp-a a thlawna ei tur (ration) a pek, October thla tîr aṭanga a tihtawp tawh chu suta free ration pek leh an phût avangin October 31, 2019 aṭang khan Tripura-a Kanchanpur/Dasda leh Ananda Bazar Road inkar kawngpui an dang.
Kawngpui dan hi tiam chin awm lo a nih avangin an la chhunzawm zel a, ni tin zing dar 5 aṭanga tlai dar 5 thleng an dang ṭhin. Fire department, ambulance, damlo, drinking water department, zirlai exam turte leh police-te erawh chu an dang lo a ni.
Mamit DC Dr Lalrozama chuan Vanglaini palai zawhna chhangin, Bru hoin kawngpui dang mah se, Bru hruai kîr hna chu an chawlhsan lo tih a sawi a, "Mamit district-a let turte bik tan centre pahnih - an camp-ah leh Kanhmunah kan siam a, kawngpui an dan avangin an camp-ah chuan kan kal thei lo ngei mai a, mahse, Kanhmun centre-a rawn kala Mizorama rawn let an awm pheuh pheuh reng tho," a ti a; nimin thleng khan Mamit district bikah chuan chhungkaw 133 an lêt tawh thu a sawi.
Dr Lalrozama chuan, kawngpui dan avangin Bru lâk lêt hna chu a khaihlak rualin, an chawlhsan lo a, Tripura sorkar lama hotute nen an inbiakpawh reng thu a sawi a, "Tripura lam official-te nen thil awm dan sawiho reng a ni. Hetih lai hian, Kanchanpur, Tripura-a awm mek kan repatriation team-te kan ngaihtuah a, mahse, ngaihtuahawm an ni lo. Tripura official-te chuan kan mite an him thu an sawi a, tun dinhmunah chuan koh haw tumna a awm lo," a ti.