RUSA enkawltute lirthei hman man kum khatah Rs. 13,92,000

Rashtriya Uchchattar Shiksha Abhiyan (RUSA), Mizoram chuan an nodal department - Higher & Technical Education (HTE) department hotute leh RUSA hotute tan lirthei man chawia hawh a phalsak a, RUSA Financial Rules anga tih a ni. Sorkar mi pawimawh, RUSA-in a suma lirthei man chawia a hawhsakte mi 10 an awm a, chu'ng atan chuan kum khatah Rs. 13,92,000 sen a ni ṭhin.

Vanglaini-in RTI Act hmanga a zawhna RUSA SPIO-in a chhan danin, RUSA suma lirthei hman phalsakte chu RUSA din tirh aṭanga June 2019 thleng khan - HTE minister, sorkar hmasa hun laia a changtu parliamentary secretary cum Mizoram State Higher Education Council (MSHEC) vice chairman, HTE commissioner & secretary cum RUSA state project director, HTE principal secretary cum RUSA SPD, chief secretary cum RUSA SPD, RUSA additional SPD, joint SPD leh finance officer-te an ni.

RUSA suma lirthei hmangtute hi sorkar liam taa RUSA enkawltu minister leh official-te an ni a, RUSA-in thla khatah Rs. 1,16,000 a séng ṭhin a; sorkar thar pawhin a chhunzawm zel a ni. RTI zawhna chhannaa a lan dan chuan, Mizoram State RUSA Financial Regulation 2015 Chapter 6 (Terms & Condition of Hiring Vehicle) tlawhchhanin lirthei hawh phalsak an ni a; Ministry of Human Resource Development-a RUSA hotute chuan RUSA sum hmanga lirthei lei a remtih loh avangin, hawhtir ṭhin niin, May 2014 aṭanga kalpui ṭan a ni.

HTE minister chu MSHEC-ah chairman a ni a, atana thla tina RUSA sum sên Rs. 29,000-ah hian driver hlawh Rs. 5,000  a tel. MSHEC chairman hmasa ber, HTE minister-in chairman hna a chelh hun February 2016 aṭanga December 14, 2018 thlenga a tana RUSA-in sum a sên chu Rs. 1,015,000 a tling. HTE changtu parliamentary secretary-in January 15 - September, 2017 inkara MSHEC vice chairman hna a chelh chhungin lirthei a hman hawh man atan Rs. 2,61,000 sên a ni.

Sorkar tharah (MNF ministry) hei hi chhunzawm zel a ni a, tuna MNF ministry hnuaia HTE minister-in MSHEC chairman hna a chelh chinah, April-June 2019 chhungin Rs. 87,000 sèn a ni tawh bawk. Hetih lai hian, GAD aṭanga thu dawn danin, minister-te hian lirthei pathum an kawl tur a nih laiin, SAD chuan pahnih chiah a pe thei a, lirthei dang chu an department chan aṭangin pawh theih a ni.

Vanglaini-in a lo tarlan tawh dan chuan, minister leh  MLA-te'n Assembly Secretariat aṭangin lirthei leina Rs. 10,00,000 an dawng a, hei hi sorkar kal mek (MNF ministry) hun aṭanga tihsan niin, sorkar term hmasa lamah chuan Rs. 8,00,000 a ni. Sorkar term hma­saa parliamentary secretary-te leh sorkara commissioner/secretary-te pawhin SAD aṭangin lirthei an dawng bawk.