KHAWTHLIR

Inrinni khan Dinthar Branch KṬP chuan an din champha pual­in an Kohhran Hall-ah blood donation camp an huaihawt a, mipa 48 leh hmeichhia pathumin Aizawl Civil Hospital (ACH) tan thisen unit 51 an pe a; ACH tan vek MSU Vanbawng ten thisen unit 15, SAY Ramhlun Vengthar ten unit 11 leh ṬKP Zo­tlang unit-te'n unit 11 an pe bawk. Chawnpui Branch KṬP-in Synod Hospital tan unit 41an pe a, petute mipa 31 leh hmeichhia 10 an ni a; Serchhip Bethel Branch KṬP-in Serchhip District Hospital tan unit 32 an pe a, petute mipa 25 leh hmeichhia pasarih an ni.

Cherhlun Branch YMA chuan an din champha vawi 49-na pualin Inrinni khan an khaw chhung thenfai hnatlang an nei a, mi ṭhahnem tak an thawk chhuak. Cherhlun hi Lunglei district-a awm a ni a, an YMA branch hi November 2, 1970-ah din niin, member 816 an awm mek a ni.

Excise & Narcotics department (END), Lunglei chuan November 1, 2019 khan an pisa thar an lawm. He huna khuallian Lunglei HPC vice chairman Lawm­awma To­chhawng, MLA chuan, END-ah thawktu tam lo mah se, khawtlang leh ram leh hnam din­chhuahna tura mawhphurhna pawimawh tak neitu an nih thu a sawi. Pisa thar lawmna hi END deputy commissioner Z Lalhmangaiha pawhin a hmanpui a ni.

Nehru Yuva Kendra (NYK), Lawngtlai district chuan Inrinni khan Lawngtlaia ANC School auditorium-ah thupuithlan hmanga thu insawisiakna, '3rd District Level Declamation Contest' an buatsaih. Thupui insawisiakna hi kum 2020 Republic Day lo thleng tur puala buatsaih a ni a, district level contest-a pakhatnain state level-ah district ai a awh dawn a ni.

Mizoram State Legal Services Authori­ty (MLSA) buatsaihin November 2, Inrinni khan Sairangah Mobile Lok Adalat neih a ni. Lo adalat-ah hian thubuai 150 vel ngaihtuah a ni a, thubuai 100 vel chinfel niin, thubuai chinfel 

aṭangin cheng nuai 200 chuang hmuh chhuah a ni. Thubuai hi MLSA member secretary Vanlal­enmawia hoa ngaihtuah a ni a, bench pathum siam a ni.