SHC inthlan campaign hun a tàwp

Sinlung Hill Council (SHC) inthlanpui hmasa ber, naktuk Thawhlehnia neih tura campaign theih hun chu nimin tlai dar 4 khan a tâwp. He inthlan turah hian council bial 12-ah candidate 42 an awm.

SHC inthlan hi November 5, Thawhlehni zing dar 7 aṭanga tlai dar 4 inkarah neih tur a ni a, vote thlak zawh veleh ballot box-a vote tlate chu council bial tina vote chhiarna tura ruahman counting hall-ah chhiar nghal tur a ni. SHC-ah hian bial 12 aṭanga thlan tlin mi 12-te bakah, sorkar aiawh member pahnih ruat leh tur a ni a, an vaiin member 14 an ni ang.

SHC bial 12-te chu MNF leh HPC ṭang dunin an chuh kim a, MNF-in bial pasarihah candidate siamin, HPC-in bial pangaah candidate an dah thung. Indian National Congress (INC) chuan bial parukah candidate an dah a, bial ṭhenkhatah independent candidate an thláwp. ZPM pawhin independent candidate ṭhenkhat an thláwp bawk.

Election Commission of India (ECI)-in a pawm political party ang chuan, MNF-in candidate pasarih, Congress-in candidate paruk, BJP leh National People's Party (NPP)-in candidate pahnih ve ve, HPC-in candidate pakhat an nei a; independent candidate 24 awmin, candidate zawng zawng chu 42 an ni.

Inthlanna felfai leh zalên a awm theih nan Aizawl DC Vanlalngaihsaka chuan November 1, Zirtawpni khan SHC huam chhunga khaw hrang hranga polling station-te a tlawh kual a; Aizawl SP Lalzahngoa pawhin venhimna lama hmalaknate a enfiah bawk.