Mau sâwngbâwl tum dan sawifiah

Mizoram Bamboo Development Board vice chairman Dr K Pachhunga, MLA chuan Inrinni khan Lunglei HPC conference hall-ah thuthar thehdarhtute a kâwm a, SEDP hmanga mau sâwngbàwl tum dan a sawifiah.

Dr K Pachhunga chuan, SEDP hnuai­ah board hrang hrang hnathawk thei tur din a nih tawh thu sawiin, "Bamboo Development Board pawh hna thawk turin a inruahman mek. Mau hi Mizoramah a ṭha duh em em a, ram changkang zawkte phei chuan mau hmanga thil siam an duh  a, tunah chuan 'The future technology of the world is bamboo technology' tih a ni tawh. CM Pu Zoramthanga’n hetiang policy a tuipui thiam hi a changkang a, amah pawh a ngaihsanawm phah a ni," a ti.

State tin chu sorkar laipuiin a phal ang tâwk sum a pek thu sawiin K Pa­chhunga chuan, "Sum hi a páwng a taka lak chhuah theih a ni lo a, sum dil nan hlasak a ngai. Kan ram hi a buai si lo a, tuilian leh thli chhiate'n a ti buai si lo a, chuvangin, sum hâi luh nan Chief Mi­nister hian bamboo policy-ah min luhpui a, hetianga mau hman ṭangkai dan leh a pawimawhna a hria hi a changkang a ni," a ti a; China-ah phei chuan mau aṭangin kawr, lukham, in chhung bung­rua leh tuizem siam chhuah a nih tawh thu a sawi.

Dr K Pachhunga chuan Mizoramah mau chi 36 a awm nia sawiin, "Mau tàmna ram ni si, mau hi sum lak luh nan kan hmang ṭangkai lo em em a, Tripura chuan nasa taka sum lak luh nan an hmang tawh. Mizoram pawhin SEDP aṭangin mauah nasa taka hmalak a tum. Sum hmuh nan mau hi hman a nih dawn avangin mau chi ṭha lak luh a ni dawn a, Tamil Nadu-a Masuri-a laboratory-ah mau lâk luh tura enchhin chu ft. 120 a sei, malpui tiat, cháng nei lo a ni," a ti.