Minister-in Union minister-te a kâwm; HEP leh food processing unit a bawhzui

Commerce & Industries leh Power & Electricity department-te enkawltu minister of state F Rodingliana chuan July 8, Nilaini khan New Delhi-ah Union minister-te a kâwm a, hydel project leh food processing unit chungchang a bawhzui.

F Rodingliana hian Union Commerce & Industries minister of state Jitin Prasada chu a pisaah a kâwm a, Mizorama advanced testing facility din chungchang a sawipui. July 3, 2026-a Board of Trade Meeting-a Commerce & Industry minister Piyush Goyal-a'n state hrang hrangah agriculture & food testing laboratory din a nih tur thu a sawi chu a bawhzui tih a hrilh.

F Rodingliana chuan, Union MoS hi sawhthing, aieng leh hmarcha sawngbawlna lama Mizoram sorkar hmalaknate a hrilh a; quality leh standard monitoring atan leh ram pawna thawn chhuahna atan validation leh certification mamawh dante a hrilhfiah.

Jitin Prasada hian Ministry-ah ruahmanna thehlut tura chahin, a lo bawhzui tur thu a sawi a; Mizo hnam incheina thawmhnawte nalh a tih thu sawiin, geographical indication (GI) tagging ti ngei turin a lo chah a ni.

Power & Electricity minister Rodingliana hian Tuivai Hydel Project tihhlawhtlinna tura hmachhawpte bawhzuiin Union Power secretary Pankaj Agarwal, Ministry of Finance-a Department of Expenditure secretary Vumlunmang Vualnam leh additional secretary D Anandhan te a kâwm a; Tuivai HEP siamna tur sum ruahman dan tur a sawipui.

Ministry of Expenditure hian Transaction Adviser, Ernst & Young LLP ten an buatsaih Tuivai HEP Detail Project Report leh financial structuring te an zir chian hnuah sawihona neih leh vat turin thu dah a ni.

MoS F Rodingliana hi Power & Electricity secretary K Lalrinzuali leh chief engineer Laltlanthanga ten an ṭawiawm.