E-roll observer-te'n Lunglei leh Hnahthialah official leh pawl aiawhte an kâwm

Electoral roll observer pahnih - Lalzarmawii leh Dr Lalhriatzuali Ralte te kaihhruaiin nimin khan Hnahthial leh Lungleiah sorkar hotu te, khawtlang leh tlawmngai pawl bakah, MJA hruaitute an ṭhukhawm a; Special Intensive Revision (SIR) 2026-ah electoral roll dik leh felfai a awm theihna tura pawimawhte leh rawtnate sawiho a ni.

Lalzarmawii hoin Hnahthialah SIR 2026 chungchang sawiho a ni a; Lalzarmawii chuan, SIR 2026 draft electoral roll-a chuang lo, India khua leh tui dik, kum tling tawhte chu an tel vek theih nan Election office nen ṭha taka thawkho zel turin tlawmngai pawl, kohhran leh MJA hruaitute a sáwm.

Hnahthiala election officer S Kaptluanga tarlan danin, electoral roll hman mekah South Tuipui bialah voter 16,478 leh polling station 27 an awm a; SIR 2026 kalpui a nih hnuah PS pakhat siam belh niin, 28 a awm tawh. Enumeration form digitise theih zat chu 15,443 an ni.

Hnahthial district-ah hian kum 2005-a anmahni emaw, an thlahtute emaw electoral roll-a chuang lo mi 1,183 an awm a; chu'ng mite chu ERO/AERO hmaah an inlan a ngai dawn a ni.

Lungleia SIR 2026 chungchang sawihonaah observer Dr Lalhriatzuali Ralte chuan, SIR kalpui meka Lunglei district dinhmun leh harsatna te, political party leh pawlte ngaihdan leh thuràwnte ngaithla. A ṭul anga Election Commission of India (ECI)-a thlen tura Lunglei tlawh a nih thu sawiin, "Lunglei hi ram dang nena inri a nih angin SIR kalpuiah fimkhur zual a pawimawh," a ti.

SIR 2026 draft electoral roll tlangzarh tâkah Lunglei district-a MLA bial paruk - Lunglei North, Lunglei East, Lunglei West, Lunglei South, Thorang leh West Tuipui bialte voter 98,808 an awm a, mipa 48,918 leh hmeichhia 49,890 an ni. Service voter 478 an awm bawk.

Tarlan danin, electoral roll hman laiah Lunglei district-ah voter 1,03,037 an awm a; SIR enumeration form lak let theih loh mi 4,229 awmin, chungte chu draft electoral roll-ah paih an ni. PS thar pahnih siam belh a nih laiin, PS awm sa pakhat tihtawp a ni a, Lunglei district-ah PS 181 a awm mek. Booth level officer (BLO) 182, assistant BLO 69, BLO supervisor 25 leh political party aiawh booth level agent (BLA) 614 ruat an ni.