Hotel leh homestay neitu SWMR zirtir

Aizawl Municipal Corporation chuan nimin khan AMC auditorium-ah AMC huam chhunga hotel leh homestay neitute pualin bawlhhlawh sawngbawlna dan thar, Solid Waste Management Rules, 2026 inzirtirna leh waste generator-te mawhphurhna hrilhfiahna an buatsaih a; hotel leh homestay neitu mi 152 an tel.

Inzirtirna hi AMC commissioner Joseph H Lalramsanga'n a kaihruai a, mayor H Lalremtluanga chuan, SWMR 2026 chu Ministry of Environment, Forest & Climate Change in Environment (Protection) Act, 1986 behchhana a duan a nih thu sawiin, "India ram pumah April 1, 2026-ah hman ṭan a ni a, mipui thawhhona zarah hlawhtling taka kalpui a nih leh ngei kan beisei," a ti a, thawhhopuiah kalkhawmte a sáwm.

Hotel leh homestay neitute chu AMC town planner C Lalmuanawma leh assistant architect Veronica Vanlalhriatpuii Colney bakah, Aizawl Smart City Ltd. assistant engineer Kennedy Vanlalnunmawia ten SWM Rules, 2026-a thil pawimawh hrang hrangte an hrilhfiah. Solid Waste Management changtu Executive corporator K Lalrodinga'n thu a sawi bawk.

Resource person-te chuan bawlhhlawh thliar hran dan tur leh sawngbawl dan tur te, waste generator-te mawhphurhnate an sawifiah a; bawlhhlawh chu chi lia thliar hran tur a nih thu te, bawlhhlawh khawn dan tur te, bawlhhlawh ngah zual (bulk waste generator)-te chungchang leh pawimawh dangte an hrilhfiah a ni.

SWMR 2026 angin bulk waste generator-te'n bawlhhlawh an sâwngbâwl a ṭul tawh dawn a; dan zâwm ṭha lo leh thu awih lote chu man theih an ni tawh dawn a ni.