MoRTH team-in Mamit tlawh

Ministry of Road Transport & Highways (MoRTH) special secretary & finance adviser Shambhu Singh leh a hote chuan November 2, Inrinni tlai khan Mamit an tlawh a, district bawrh­sap Dr Lalrozama hoin khaw­tlang hruaitute nen an inkâwm.

Dr Lalrozama chuan, National Highway no. 108 chu Mamit district tan kawng pawimawh tak a nih thu sawiin, kawng laih zawh a la nih loh vanga district mipuite'n harsatna an neih hrang hrangte a sawi a; a hma thei ang bera kawng siam hna zawh ni se an duh thu, Shambu Singh hnenah hian a thlen a ni. Shambu Singh pawhin a hma thei anga hmalak a nih tur thu a sawi.

Mizoram PWD hotute chuan, NH-108 la laih zawh loh Mamit leh Dâpchhuah khaw inkara Dàmpui khaw hnuai lungpui hmun chu kum­in chhunga laih zawh hman an tum thu te, Dapchhuah lei dawh tur chu an harsatna lai ber a nih thu te, June 2020 hmaa dawh zawh hman an inbeisei thute leh, lei dawh hmaa hman turin a hêlna an siam tur thute an sawi a ni.

Shambu Singh leh a hote hi Mizoram PWD Highway Division-in NH-108 an siam mekah revised estimate siam enfiah tura Mamit tlawh an ni.