Ruahsur vangin chhim lamah harsatna
Tun hnaia ruahsur avangin Mizoram chhim lama hmun ṭhenkhatah harsatna a thleng. Bualte daia July 7, Thawhlehni zana leiminin NH-54 a hnawh pin chu nimin thleng khan a la ping a; Khaw-thlangtuipui lianin Tlabungah in eng emaw zat a chîm.
Khawthlangtuipuiin a chîm chin a sang chho a, Tlabung leh a chhehvel khuaa chenna in eng emaw zat a chîm avangin, chhungkua an insawn chhuak. Tlabungah chhungkaw 34 leh Tippereghat khuaah chhungkaw 35 vel hmun him lamah an inthiar chhuak nia thu dawn a ni.
Ruahsur leh tuilian vanga harsatna thlenna hmunte hi Tlabung SDO (Civil) Moses Lalfakawma Tlau leh sorkar hotu dangte'n an tlawh kual a, a theih ang angin chhawmdawlna an buaipui a ni.
Bualte dáia leiminin NH kawng a hnawh hi excavator pahnihin ngawrh takin thian mah se, lei a min belh zel avangin nimin tlai thleng khan kawngpui a la tlang lo. Bualte kaltlang turte chu harsatna an tawh loh nan chincháng ngaichang hmasa turin Lunglei Additional DC-in a chah.
Bualte daia leimin hi bialtu MLA Lalramliana Papuia leh sorkar official-te chuan nimin khan an tlawh a, Bualte leh Ṭhualṭhu khawtlang hnenah ṭanpuina pawisa a hlan. Lunglei BDO Grace Lalremdiki Sailo pawhin Lunglei DDMA sum aṭangin Bualte khawtlang hnenah pawisa a pe a, Lawngtlai SDO (Sadar) Collin Hlychho pawhin Bualte khawtlangin tangkhangte an buaipuina senso atan pawisa a pe a ni.
Lunglei South bialtu MLA hian Salem Venga Nursing School hungna chimin mimal in a delh chhiat tlawhin, YMA hnenah pawisa a pe a; Theiriata leiminna hmun pawh tlawhin, khualzin tangkhang ei leh in siamsaktu Theiriat YMA Saizahawla Section hnenah ṭanpuina pawisa a pe. Hrangchalkawn leh Sethluna leiminte a tlawh bawk.
Bualte daia leimin vang hian lirthei leh mihring eng emaw zat an tangkhang a, tangkhangte chu Bualte YMA-in ei tur an siamsak. Leimin vanga harsatna thlenga chhawmdawlna atan Central YMA-in Bualte YMA hnenah Rs 10,000 leh Ṭhaizawl YMA hnenah Rs 5,000 an pe a, Lunglei Sub-Hqrs YMA hruaitute'n an hlan.
Lunglei leh Hnahthial inkar NH kawng-pui pawh Dâwn khaw bulah nasa taka leiminin kawngpui a hnawh ping bawk.