CADC CEM thar Nirupam Chakma-in fiahna a paltlang

10th July, 2026

Chakma Autonomous District Council (CADC) chief executive member atana lak luh thar Nirupam Chakma chu nimin khan CADC Session Hall-ah fiah a ni a, fiahna a paltlang.

Nirupam Chakma fiahna (floor test) inkhawm hi CADC deputy chairman Sundor Muni Chakma-in a kaihruai a, MDC 19-in vote an thlak. MDC 18-in CEM thar an thláwp a, MNF member awm chhun Rasik Mohan Chakma erawh chu ṭhutkhawmah hian a tel lo thung.

BJP MDC Nirupam Chakma hi CEM atan July 8, 2026 khan Lawngtlai DC-in rinawmna thu tiamtirin a la lut a; nimin khan floor test neih nghal a ni.

Tarlan tawh angin, CADC-ah hian mipui thlan tlin MDC 20 an awm a; party-te'n MDC an neih zat chu - BJP-in 10, ZPM-in pakua leh MNF-in pakhat a ni a, BJP leh ZPM hian Chakma Democratic Alliance Legislature Party dinin, sorkar inṭâwm an siam a ni.