VC-te'n an lawmman tihpun thuai an duh thu CM hnenah an thlen

All Mizoram Village Council Association (AMVCA) hruaitute chuan nimin khan chief minister Lalduhoma a pisaah an kâwm a, VC lawmman tihpun vat an duh thu an thlen. CM hi Rural Develop-ment & Administration minister Prof. Lalnilawma'n a ṭawiawm.

AMVCA hruaitute chuan, 15th Finance Commission grants an hmuh kim theihna tura hma a lak avanga an lawm thu Chief Minister an hrilh a; Aizawlah VC hostel/guest house sakna tur an lo thlen tawh chu a hmun tur an neih tawh thu an sawi.

Chief Minister chuan, VC-te pawimawhna leh VC hostel/guest house ṭangkai taka hman tur mamawhna a hriat thu sawiin, a sakna tur tihsak a tum thu a sawi a; thil ṭul apiangah chak taka hma la turin a kaihhnawih department-te a hrilh.

AMVCA hruaitute chuan, VC lawmman tihpun vat an duh thu sawiin, theihtawp chhuahpui zel turin CM an ngen. Mizoram Finance Commission grants kum eng emaw zat budget allocation-a tel ṭhin a taka hman ni ngai tawh lo chu, a nihna tur ang taka hman a nih theih nana hma la turin an ngen bawk.

AMVCA hruaitute sawi danin, Mizoram Finance Commission hi hman a nih chuan 16th Finance Commission grants hnuaiah state performance grants kum kal zel turah a tam zawk an dawng theih dawn a ni.