Chemical aiah bio fertiliser hman a ni dawn - Agriculture Minister
Organic thar chhuah lama hma latu Reiek leh a chhehvel khuate inzawmkhawmin an din, Reitlang Organic Producers’ Company Limited (ROPCO Ltd.) chuan November 2, Inrinni khan Reiek community hall-ah Annual General Meeting an hmang. Khuallian, Agriculture minister C Lalrinsanga chuan, chemical fertiliser aiah bio fertiliser hman a nih dawn thu a sawi.
Agriculture Minister chuan, phai lam aṭanga Mizorama chawhmeh lutte chu damdawi leh chemical a tihṭiah leh enkawl a nih avangin a hrisel lo tih a sawi a, "Hengte hian natna hrang hrang - tha natna, kal natna leh a dangte hi a thlen em tih ngaihtuah tham a ni. Sorkarin chemical fertiliser aiin bio fertiliser, lei hànna tichhe thei lo hman ṭan a duh a, bio fertiliser laboratory unit leh a kaihhnawihte din vat a ni dawn," a ti.
Sorkarin ei leh bara intodelh nan kawng hrang hranga hma a lak dante sawiin C Lalrinsanga chuan, "Agriculture lamah pawh ṭhalaite'n entrepreneurship hmangin ke an pên a ngai dawn a, sorkar pawhin ṭan a lakpui dawn," a ti a; buh leh bâl chìnna kawnga ram hman dan leh enkawl 'land management' chu a veiawm thu a sawi.
Agriculture Minister chuan, Mizoramin organic farming tih tak zeta a buaipui a, thar chhuahte ram páwna hralh tur a neih tam chuan Mizoram economy nasa takin a ṭhang thei dawn tih sawiin, "Organic farming kawng hi thui tak, thil tam tak paltlang ngai a ni. Rinawmna leh dik taka thil tih a ngaih avangin tih ve mai mai rilru puta buaipui chi a ni lo," a ti.
Bialtu MLA Lalrintluanga Sailo pawhin thu sawiin, MIP hun laia Reiek leh a chhehvela aieng bul ṭanna chuan tunah organic lam kawng zawha company-te hial dina hmalakna a awm chu lawmawm a tih thu a sawi a, "Organic thar chhuah reng reng a hralhna man a to a, mahse, thar chhuaha rinawm a ngai dawn a, chemical zungzám ang chi engmah a awm tur a ni lo," a ti a; ROPCO shareholder-te chu sum tam tak aiin hming-
ṭhat thlang turin a fuih.
ROPCO Ltd. hi kum thum kal ta khan Farmer Producer Organization anga bul ṭan a ni a, aiengah bul ṭanin, organic certification nei turin an buaipui a ni.