Lungleiah CCTV project hawng

Lunglei khawpui a him zawk theihna tura cheng nuai 150 sénga bun, ‘Lunglei Town Surveillance (CCTV) Project’ chu Inrinni khan Lunglei High Powered Committee (HPC) vice chairman Lawmawma To­chhawng, MLA-in Lung­lei SP pisaah a hawng.

Project hawnna inkhawm hi Lunglei SP C Lalthanmawia'n a kaihruai a; Lawmawm­a Tochhawng chuan, CCTV project bul ṭantu leh tihlawhtling tura hun leh thâ leh ngaihtuahna nasa tak sengtu, HPC vice chairman hlui S Lal­dingliana (L) chungah lawmthu a sawi a, "Pu S Laldingliana'n Lung­lei district mipui tana a ṭhahnemngaihna chuan rah ṭha a la chhuah zel a ni," a ti.

Lunglei Town Surveillance (CCTV) Project hnuaiah hian first phase (August 23, 2018 - November 13, 2018) leh second phase (June 13-28, 2019) chhungin Lunglei khawpui hmun pawimawh leh lûn lai hmun 20-ah camera hrang hrang 38 bun a ni.