MZU under graduate result a chhuak; Graduate thar mi 3,512 an awm

Mizoram University chuan nimin khan under graduate final (sixth) semester result a tichhuak a, graduate thar 3,512 an awm. Graduate thar zingah Pachhunga University College (PUC)-a B.Sc. Physics zirlai Laltluangpuii Jongte a ti ṭha ber.

MZU under graduate result chhuakah hian 6th semester (final year) bikah zirlai exam 3,563 zinga 3,512 an hlawhtling a, pass pencentage 78.92 a ni. Nikumah zirlai 3,981 an pass a, pass percentage 75.33% a ni a; nikum aiin kuminah graduate thar 469-in an tlem zawk a, pass percentage erawh kuminah a ṭha zawk.

Arts-ah zirlai exam 3,563 zinga 2,800 (78.59%) an pass a, Science-ah exam mi 523 zinga 377 (72.02%) an hlawhtling. Commerce-ah zirlai exam 323 zinga 295 (91.33%) leh Home Science-ah zirlai 16-te an pass vek a; Social Work (BSW)-ah zirlai 25 zinga 24 (96%) an pass. Stream tinah nikum aiin kuminah pass percentage a sang zawk a ni.

Graduate thar zinga gold medalist (stream tina ti ṭha ber)-te chu BA-ah Julian Lalfakzuala, Economics, Hrangbana College, CGPA (Cumulative Grade Point Average) 9.39 a ni a; B.Sc.-ah Laltluangpuii Jongte, Physics, Pachhunga University College, CGPA 9.70 a ni.

B.Com-ah Namrita Sharma, PUC , CGPA 8.65 a ni a; B.Sc. (Home Science)-ah RS Vanlalmalsawmi, Zirtiri Residential Science College, CGPA 7.98 niin, BSW-ah David Lalrinsanga, Divine Mercy College, CGPA 7.28 a ni. Stream tina ti ṭha ber zingah Laltluangpuii Jongte, PUC mark hmuh a sang ber a ni.

Thu dawn danin, university result-ah hian CGPA 8 chin chung lam (8-10) distinction, CGPA 6 leh 8 inkar (8 tling lo) first division, CGPA 5-6 (6 tling lo) second division, CGPA 4-5 (5 tling lo) pass a ni a; CGPA 4 hmu tling lote chu fail an ni.