Thlai chìn dan enpui tam turin Horti. Minister-in officer-te a chah

Horticulture depart-ment chuan nimin khan Directirate-ah Depart-mental Review Meeting an nei a, Horticulture minister C Lalsawivunga'n a hmanpui. Minister chuan, field-ah nasa zawka feh chhuak a, kut hnathawktute thlai chìn dante enpui turin Horti-culture officer-te a chah.

C Lalsawivunga chuan, Horticulture department chu kut hnathawktute nena inhne hnai ber leh Mizoram dinchhuahna tura pawimawh ber zinga mi a nih thu a sawi a, "Nasa taka kan thawh lai hian hmasawnna tur tam takah kan la nei. Horticulture officer-te hi mithiam, a zira zirte in nih avangin in lo tih mek angin field-ah kut hnathawktute thlai chin dante zirtir a, enpuiin, nasa lehzualin feh chhuak ang che u," a ti.

Damdawi/hlotúr tel loa thlai enkawl (organic farming) a ṭul thu sawiin Minister chuan, "Kan rama natna tam tak kan neih mek, tun hmaa kan hriat ngai lohte hi chemical fertilizer, pesticide leh hlotûr te kan ei tel tam vang em ni ang tih a ngaihtuah theih; department-in organic-a thlai chìna enkawl a nih theih nan chak zawka hmalak a ṭul," a ti a; hmalak ṭanna atan organic farming hmanga sawhthing chînga zirchian a ni chu lawmawm a tih thu a sawi.

C Lalsawivunga chuan, bawng êk leh zun hmanga leiṭha siam turin Horticulture department leh AH&Vety department ten thawhho an tum thu sawiin, "Meeting neih tawh a ni a, chemical tel lo thlai leh thei kan thar theih nan hmalak zel kan tum," a ti. Kaladan Multi-Modal Transit Transport Project atan inbuatsaih a pawimawh thu sawiin, ram chhung leh pawna thawn chhuah tur thlai leh thei thar a ṭul thu a sawi bawk.

ṬHUTKHAWMA TARLAN ṬHENKHAT:

▶ Horticulture department hnuaiah Bána Kaih first phase-ah mi 92 hnenah loan pek a ni a, CM Special Package first phase-ah mi 297 hnenah ṭanpuina pek a ni. Second phase-ah mi 177 hnenah ṭanpuina pek turin hma an la mek.

▶ Thing leh mau tichereu lo zawnga sawhthing chìn dan ṭha zawk ‘Sustainable Cultivation of Mizo Ginger’ zirbingna hmun hrang hrangah kalpui mek a ni.

▶ DoNER hnuaiah Inter-Ministerial Project – 'Sustainable Cultivation and Post Harvesting Management of Mizo Ginger' kalpui turin a ṭul angte bawhzui mek a ni.

▶ Mualkawi, Vaphai, Zotlang leh Tualchengah Ginger Processing Units din tur a ni a, DoNER aṭangin cheng vbc 30.13 sanction letter dawn a ni tawh.

▶ Lunglei district-a Mausenah Banana Fibre Extraction Unit din mek a ni a, Handholding aṭangin cheng vbc 1.50 hmuh a ni.

▶ Balhla kûng aṭanga la duang (fibre) siam chhuahna tur din mek a ni a, hna 25% thawh tawh niin, kuminah peih tum a ni.

▶ Centre of Excellence for Floriculture chu Indo-Dutch Cooperation hnuaiah proposed niin, Ṭhiaka Horticulture Centre-ah dah tura ruahman a ni.