Râltlânte pek tur buhfai vailiam

Serchhip district bawrhsap Paul L Khuma chuan nimin khan DC pisa kawt aṭangin Serchhip district-a raltlante hnena sem tur buhfai kg 31,789 a vailiam. Serchhip district-ah hian Myanmar, Bangladesh leh Manipur aṭanga rawn raltlan mi 908 an awm mek.

Tarlan danin, sorkar laipui ruahman angin, raltlante hnena buhfai sem tur hian Serchhip DC pisaa raltlan list awm sa chu tun hnai khan Serchhip Sub-Headquarters YMA huam chhunga branch-te hnenah pek a ni a, list enfiahna a nih hnuah Serchhip DC pisaah thawn let a ni.

YMA branch-te report-a a lan danin, Serchhip district-ah hian raltlan mi 908 an awm mek a; Myanmar mi 648, Bangladesh mi 239 leh Manipur mi 21 an ni. Raltlante hnenah hian mi pakhat tan buhfai kg 35 zel pek a ni ang.

Raltlan list-a a lan danin, Thenzawl Farm Vengah raltlan 172 awmin an tam ber a, raltlan awmna ni si, awm tlem berna Khawbelah mi pahnih an awm. Bangladesh aṭanga raltlan mi 239-te chu Thenzawla awm vek an ni.