Tuipui Tlawhchhan Joint YMA sangha fuan vên khârna inkhawm buatsaih

Tuipui Tlawhchhan Joint YMA chuan November 2, Inrinni khan Khawbung PHE pump house-ah kum 2019 chhunga sangha fuan vên khàrna inkhawm an buatsaih a, Fisheries mi­nister K Lalrinliana'n a hmanpui.

K Lalrinliana chuan, sorkarin lui dung nungcha humhalh tura ngaih­tuahna a sèn nasat thu sawiin, "Dan thar The Mizoram Fisheries Conservation Rewards Scheme, 2019 pawh rei lo têah hman theih beisei a ni. He dan hnuaiah hian dan phal loha lui dunga nungcha suat ṭhinte hremna, lui dung nungcha humhalh tura thawk nasate lawmman/ṭanpuina pek dan turte ruahman a ni. Mimal leh pawl anga lui dung km. 1 aia thui humhalhtute hnenah lawmman ṭha tak siam a ni," a ti.

Mizoram chu sangha leh luia nungchaah a intodelh lo tih sawiin Fi­sheries Minister chuan, "Sangha pawh ram páwn aṭangin kan la lut nasa a, kaikuang phei chu a váng lehzual a, chakai leh chêngkawl tlemin zia deuh mahse kan intodelh chuang lo," a ti a; luia nungchate humhalh ṭhat a nih chuan rei lo têah Mizoram lui dung zawng zawng hi mi tin tana sangha dilah a chantir theih tur thu a sawi.

Fisheries Minister hian Tuipui Tlawhchhan Joint YMA hnenah a ṭula hman atan Rs. 15,000 a pe a, sangha veng ṭha YMA-te lawmman tur a tumsak bawk. Tuipui Tlawhchhan Joint YMA hi kum 2007-a din a ni a, a huam chhungah YMA branch 13 - Khawbung, Záwlsei, Khuangthing, East Lungdar, Sailulâk, Léng, Biate, Sialhâwk, Sialhâwk North, Búngzung, Zawng­te­tui, Riangtlei leh Vàngtlangte a awm.

YMA branch 13-te hian Tuipui lui dung tluanin chan an insem a, kum­tluanin sangha humhalhin, kawng hrang hrangin sangha humhalh chungchang zirtirna an inpe ṭhin. Sangha fuan hun azirin October-November thla chhung an veng ngawrh bik ṭhin bawk.