KHAWTHLIR

Khawlianah in kâng

July 9, Ningani zing dar 6 vel khan Khawlian, Saitual district-a Lalnunpuia in, Assam type chu bungrua chuh hman lohin a kâng ral a, thi leh hliam an awm lo. In kâng neitu hi Khawlian khawtlang chuan nimin khan in an saksak leh nghal a; bialtu MLA Lalbiakzama, Assembly speaker-in in chung rângvâ tur bundle nga a pe a, Phullen BDO J Lalhmahruaia'n a hmunah a enfiah bawk.

BLO-te tan training

Aizawl Bawrhsap Pisapui Hall-ah nimin khan Aizawl district-a MLA bial 12-a booth level officer atana ruat thar mi 37-te pualin Special Intensive Revision (SIR) 2026 kalpui dan tur inzirtirna buatsaih a ni. Inzirtirna hi Election officer Samuel Zodinsanga’n a kaihruai a, assistant commissioner F Lalnisai, state level master trainer ni bawk leh Lalfakzuala ten thil pawimawhte an zirtir a ni.

Lungsen PHC tlawh

Mizoram State Health Care Society chief executive officer Dr Lalhriatzuali Ralte chuan July 9, Ningani khan Lungsen Primary Health Centre (PHC) a tlawh. CEO chuan, Mizoram Universal Healthcare Scheme leh Ayushman Bharat - Pradhan Mantri Jan Arogya Yojana kalpui chungchanga PHC dinhmun a enfiah a, mipuite'n an chhawr ṭangkai zel theih nan theihtawp chhuah turin thawktute a chah.

ESIC awareness

Ministry of Labour Employment hnuaia Employees’ State Insurance Corporation (ESIC) Statutory Body chuan nimin khan New Champhai ESIC Dispensary cum Branch Office-ah 'Awareness cum Free Health Check-up Camp' an buatsaih. ESIC Act thil tum tlangpui leh hamṭhatna awm thei hrang hrang a lem nen an zirtir a; ESIC doctor leh nurse ten kal khawmte hriselna dinhmun an enfiah bawk.

Zawhfiah theih

Bána Kaih (Handholding) office CEO chuan, Bána Kaih scheme-a loan leh CM Special Package dilna atan helpline number 8119-019-900 siam a nih thu leh, phone call/whatsapp hmangin zawhfiah theih reng a nih thu a tarlang.