END-in 2026-ah meth kg 63.804 heroin kg 15.480 an man tawh

Excise & Narcotics department chuan nimin khan an Commissionerate-ah Crime Review Meeting an nei a; kumin 2026-ah heroin kg 15.480 leh methamphetamine kg 63.804 an man tawh thu an tarlang.

Review meeting hi END commissioner Z Lalhmangaiha'n a kaihruai a, Aizawl leh district hrang hranga department hotute an tel. The Narcotic Drugs & Psychotropic Substances Act, 1985 leh The Mizoram Liquor (Prohibition) Act, 2019 te khauh zawka kenkawh dan turte an sawiho a ni.

Dan kenkawhnaa an thawhpui tlawmngai pawl leh department hrang hrang bakah, khawtlang nena thawhhona ṭha tak neih chhunzawm zel turin an inchah.

Ṭhutkhawma tarlan danin, END hian kuminah January 1 aṭanga nimin thleng khan heroin kg 15.480 leh methamphetamine kg 63.804 an man a, crystal meth kg 10.882, ganja kg 133.470 leh khuh damdawi (cough syrup) bûr 8,213 an man.

Zu leh a kaihhnawih lamah, rakzu lt. 37,100.414, zu bilh lai lt. 75,646, sapzu (IMFL - India siam) lt. 14,591.880, beer lt. 21,290.800, sapzu (FML ram dang siam) lt. 40.400 leh BEDC (Burma zu) lt. 499.100 an man a ni.

2026-A EXCISE-IN AN MAN

(January 1 - July 10)

Heroin kg 15.480

Methamphetamine kg 63.804

Crystal meth kg 10.882

Ganja kg 133.470

Khuh damdawi bûr 8,213

Rakzu lt. 37,100.414

Zu bilh lai lt. 75,646

Sapzu (IMFL) lt. 14,591.880

Sapzu (FML) lt. 40.400

Beer lt. 21,290.800

BEDC (Burma zu) lt. 499.100