Tlangnuam kum 114-na an lawm

Aizawla veng hmasate zinga mi, Tlangnuam chuan kumin hian kum 114 a tling a, Tlangnuam Local Council hmalaknain November 1-2 chhung khan an lawm.

Tlangnuam kum 114 tlin lawm nan hian November 1, Zirtawpni zan khan Cente­nnial Free Concert an huaihawt a, Inrinni khan lawmna pui hmangin, nilengin khawtlang huapin hun an hmang a, tlaiah ruai an ṭheh. Kum 114 tlin lawmna pual­in hla inphuahsiak an huaihawt a, Tlangnuam tlang chhipa JF Viewing Gallery-a lungphun­ an siam chu bialtu MLA Lalchhuan­thanga'n a hawng bawk.

Aizawl South-II bialtu MLA Lalchhuanthanga chuan, tunlai khawvelah internet leh social network service hrang hrangin chhungkaw tin a rún tawh tih sawiin, "Chuvangin, veng tin leh khaw tinin kan ngaih pawimawh tur chu 'chhungkaw ṭha din' a ni. Chhungkua hi kan ngaihthah chuan khawtlang a dam thei lo a, ramin a tuar ṭhin a ni," a ti a; Mizo nun ṭha ngaihhlut leh ngaihsan te, aia upate zahte inzirtir thar leh a ṭul thu a sawi bawk.

Tlangnuam hi Lalchhinga leh a khua leh tuite’n kum 1905-a an din a ni a, anni hi Hriangmual (tuna Mission Veng)-ah an awm ṭhin. A tirah chuan a dintu leh awm hmasa Lalchhinga hming chawiin 'Lalchhinga Veng' tih a ni a, Lalchhinga hnua sap hoin lal atana an ruat Paliana Hauhnar chuan 'Tlangnuam' tiin a hming a phuah a ni.